Kompreneble,
se
vi havas tian dokumenton, do havu ĝin. Vi povas havi eĉ
kelkajn dokumentojn konfirmantajn kelkajn (viajn)
identecojn. Ja vivas homoj kiuj asertas, ke MI estas
multpersona – nu, eble nur kelkpersona – kaj ĉiu el tiuj
malpligrandaj MI (do oni povus skribi mi – kiel
oni povus diri tion: malpli laŭte? flustre?) devus havi tian dokumenton.
Jen tre interesa ideo. Tute ne kurioza koncepto. Tiuj mi (mioj aŭ mij? aŭ eble mi-j?)
povas havi aspekton diakronan (mi-estinta, mi-estanta, mi-estonta...)
kaj ankaŭ aspekton sinkronan aŭ sinkronan-spacan (mi-interna, mi-ekstera, mi-elpensita, mi-socia, mi-familia...) Bilokacio, aŭ samtempa
ĉeestado en du diversaj lokoj, tiaperspektive ŝajnas
nenio precipa. Oni povas eĉ diri pri multlokacio. Tamen
bilokacio (aŭ multlokacio) bezonus sufiĉe grandan
aŭtonomion de unuopaj mi, por ke ili (aŭ mi-j) povus aperi aparte. Oni
ne scias ĉu tia aŭtonomio estus akirebla. Ĉu la edroj de
la kubo povus apartiĝi de la kubo ne neniigante samtempe
la kubon mem? Ja estas
sufiĉe multe da homoj kiuj pensas, ke iu
transformo okazis en ili, aŭ ili iele transformiĝis kaj
nun ili estas iuj aliaj ol ili estis antaŭ la
transformo, do la dokumento eldonita antaŭ la transformo
konfirmas identecon de iu alia, de iu kiu ili jam ne
estas kaj kiu sendube ne estas identa kun ili, do ili
bezonas novan dokumenton eldonitan post la transformo.
Transformoj povas esti diversaj, foje iu transformiĝas
nur parte, iome aŭ iomete, ne
tute kaj tiam li estas parte tiu kiu jam estis kaj
parte kiu jam estas. Tamen, ĉu eblas la
transformo plena kaj tuta? Verŝajne papilio estas io
tute alia ol raŭpo de kiu ĝi devenas, sed la materialo
estas la sama. Jen la situacio simila al negranda tablo
farita el malnova ŝranko – vi sidas ĉe tia tablo kaj
tute ne suspektas, ke ĝi iam estis la ŝranko, tamen la
plankoj estas la samaj. Trasformoj ne nepre devas esti abruptaj,
rapidaj kaj neatenditaj, klare videblaj kaj
efektoplenaj. Ja ni transformiĝas
senĉese, senripoze, senpaŭze. Ĉiutage ni vekiĝas iomete
malsamaj ol ni enlitiĝis la tagon antaŭan. Ni hodiaŭaj
estaj iomete, nerimarkeble sed iom iom malsamaj,
neidentaj kun ni hieraŭaj, sed ni antaŭ-du-jaraj estas
rimarkeble neidentaj kun ni hodiaŭaj kaj nin
antaŭ-mult-jarajn ni rekonas malfacilege aŭ ni nur
simulas rekonadon kaj fakte ni estas profunde konfuzitaj
kaj mirigitaj dum iu provas konvinki nin, ke jen ni
troviĝas je la foto. Kaj ni cerbumas kiel ni povis fari
tion kion ni faris tiam, ĉar nun ni tiaĵojn certege ne farus. Tio havus vere
interesegaj konsekvencoj leĝaj kaj juraj. Ekzemple:
advokato povus konstati, ke la ulo kiu faris la krimon
estis iu alia ol la ulo kiu sidas nun sur la benko de
akuzitoj. Ekzemple: se la testamento estis skribita
antaŭ dek jaroj tiam la riĉaĵon estis heredigita al tiu
kiu nun jam ne ekzistas – tiu kiu nun ekzistas kaj
asertas ke estas la heredanto povas tiomgrade
diferenciĝi de la ulo indikita en la testamento (ja
povas okazi, ke li transformiĝis plene kaj profundege),
ke ĝuste mortinta riĉulo tutcerte testamentus al li
nenion. Ekzemploj povas esti multegaj kaj ĉiu facile
trovos la sian, kompreneble se volos ludi tiamaniere –
tia ludo estas sufiĉe morna, do eble estos pli bone ne
manki la tempon kaj la tempon tiel ŝparitan oni povos
uzi por solvi la jenan problemon: ĉu papilio povas
responsi pri tio kio faris raŭpo? Rezultas el tio, ke iu
devus havi ne unu dokumenton, sed tutan valizon da
tiuj. Nu! Kofrojn. Bretojn. Tutan egan bibliotekon iu
devus portegi ku si. Arkivejon plenegan, eĉ
eksplodantan je atestoj kaj konfirmoj. Karavanoj
tramarŝus Liberlandion. Karavano post
karavano. Serpentumantaj kolonoj de porteguloj. Nu! Ja
tiuj dokumentoj bezonus atestojn konfirmantaj iliajn
originalecon, ĉu ili estas aŭtentaj aŭ falsaj – kaj tiuj
atestoj ankaŭ bezonus konfirmaĵojn – kaj tiel plu. Ja
falsaĵoj troveblas ĉie kaj ĉiam. Oni devas esti
atentegaj ....... Kaj se iu malŝatas kolekti montojn da
paperaĉoj li aŭ ŝi povas fari sian propran dokumenton.
Tiaj manefaritaj dokumentoj sendube estus nefalsaj (eĉ
se ili estus falsaj, ili estus aŭtentaj kaj veraj, vere
memfaritaj) kaj konfirmus ankaŭ, aŭ eble ĉefe kaj antaŭ
ĉio la mensostaton de la faranto. Manefarita pasporto
estus ankaŭ multe pli interesa kaj pli kredebla ol
pasporto produktita serie, milionkopie, kaj distingebla
de ĉiu alia pasporto nur perfote – kvankam tio ankaŭ
estas ia vero pri ni, tio ke ni distingeblas unu de
l'alia ne tiom multe kiom al ni ŝajnas ..... Tamen
bolnovu sciiĝi, ke ĉi tie troveblas neniu elŝutebla ŝablono.
Se vi almigris ĉi tie, vi sendube ne estas la pigrulo.