53 jarojn mi estas en la mondo. 53 jarojn mi vivas inter la libroj. 45 jarojn mi legas la librojn. 34 jarojn mi verkas la librojn kaj malpriskribas la mondon. 32 jarojn mi ludas tamburojn, surbendigas la muzikon kaj koncertas kun diversaj grupoj en diversaj landoj. 30 jarojn mi ne studas l’arkitekturon. 19 jarojn mi tradukas diversajn librojn el diversaj lingvoj. 15 jarojn mi havas komputilojn kaj printilojn. 14 jarojn mi loĝas en la vilaĝo ĉe Montoj Kalvaj, mezpollande, en la lando de formortintaj sorĉistinoj kie la komenca punkto de spirala kalendaro povus esti la jaro kiam Ts’ai Lun unuafoje produktis paperon uzeblan por skribado. 14 jarojn mi estas la edzo de Krystyna. 13 jarojn mi estas la patro de Sabina. 8 jarojn mi faras lignajn skatolojn por miaj libroj. Mi daŭre ne faras paperon; eble iam mi komencos. Anstataŭ de tempo al tempo mi projektas diversaĵojn: afiŝojn, ĝardenojn, kovrilojn, ekspoziciojn ..... Mi ne enuas. Miaj libroj troviĝas en la kolektoj de Nacia Biblioteko en Varsovio, Biblioteko de Lodzo Universitato, Muzeo de Libro Arta en Lodzo, Biblioteko de Stanford Universitato, Wexford Arts Centre, The School of the Art Institute of Chicago (Flaxman Library), The New York Public Library, The British Library, Canadian Centre for Architecture en Montrealo, Kunstindustrimuseum en Kopenhago, Kielce Vojevodeja Biblioteko; ankaŭ en la kolektoj privataj en Pollando kaj eksterlande. Mi montris ilin je diversaj ekspozicioj, festivaloj kaj foiroj de libroj normalaj kaj nenormalaj en Pollando kaj alilande (Germanio, Anglio, Usono, Irlando, Danio, Nederlando, Bulgario, Izraelo, Slovakio, Ĉeĥio, Hungario, Belgio. Svedio, Finlandio, Koreio). Ĉiujn laborojn neprajn por krei la libron mi faras mem en mia domo: mi verkas, desegnas, tradukas, redaktas, projektas, imagas, printas, bindas. Ĝis nun aperis dekkelkaj titoloj, pli ol 400 ekzempleroj kune; ĉiu ekzemplero estas numerita kaj de mi subskribita. Tiom malnombraj eldonoj ne estas rezulto de iuj bizaraj premisoj, sed de limigitaj povoj teknikaj, ankaŭ de tio, ke mi bedaŭrinde ne estas la monstro centmana. <<<